त्याचे दर्शन सकळां

पंढरीच्या विठोबाला
मी पंढरपुराहून आणले,
माझ्या दारावर त्याला
सगळ्यांसाठीच ठेवले...॥
गाभाऱ्यात मंदिराच्या
भक्ताची हेटाळणी,
मन गाभाराच व्हावे
वसो ज्ञाना तुकाची  रे वाणी!॥
नाही पंढरपुरा येणे
झाले चंद्रभागेचे दर्शन
दीपले माझे मन
पाहून मंदिर तुझे छान॥
सभामंडपी कीर्तन,
देश ऐक्याचे ते गान
भक्ति-ज्ञानाच्या योगाने
हरपलेले देहभान॥
जवळ येता रे गाभरा
ओलावलल्या नेत्रकडा,
आत बघणार होतो
ट्रेनमधल्या पांडुराया॥
पैस, हरिपाठ,
अभंग अन् गवळणी
तानांची आरती
तैसी दिसे गा विठाई?॥
प्रवेशिलो गाभाऱ्यात
तैसी थाप पाठीवर
दुरून दर्शन ते झाले ,
कानी "सरका पुढे, सरका पुढे"॥
ठेवण्या मस्तक त्याचे पायी
दृष्टी पायाशी खिळलेली
थाप दुसरी पडली,
"सरका पुढे"ची ती घाई.॥
अर्पिता तुळशी हार
रूप सुंदर पाहिले, मग
तिसऱ्या थापे सरशी
सोडला गाभारा मनाने.॥
मग आलो घरी घेऊन
एक विठोबा मनीचा
ज्याचे दर्शन रे व्हावे
सकळां येता जाता...॥
-सम्प्रिः।